میں تیرے جلووں میں کھو گیا ہوں مجھے اب اپنی خبر نہیں ہے

جنہیں ہے ڈر راہ امتحاں سے انہیں ابھی یہ خبر نہیں ہے

اگر کرم ان کا راہبر ہو کٹھن کوئی رہ گزر نہیں ہے

تری طلب تیری آرزو میں نہیں مجھے ہوش زندگی کا

 جھکا ہوں یوں تیرے آستاں پر کہ مجھ کو احساس سر نہیں ہے

جہاں بھی ہے کوئی مٹنے والا تری عنایت کے سائے میں ہے

 بنا لیا جس کو تو نے اپنا جہاں میں وہ در بدر نہیں ہے

بہ شوق سجدہ چلے ہیں لیکن عجیب مسلک ہے عاشقوں کا

 وہاں عبادت حرام ٹھہری جہاں ترا سنگ در نہیں ہے

ہر اک جگہ تو ہی جلوہ گر ہے وہ بت کدہ ہو یا طور سینا

 نگاہ دنیا ہے کور باطن تری تجلی کدھر نہیں ہے

تری نوازش مری مسرت مری تباہی جلال تیرا

کہیں نہیں ہے مرا ٹھکانہ جو تیری سیدھی نظر نہیں ہے

 یہیں پہ جینا یہیں پہ مرنا یہیں ہے دنیا یہیں ہے

عقبیٰ فناؔ در یار کے علاوہ کہیں ہمارا گزر نہیں ہے

چاند تاروں سے کروں باتاں تیری باتاں تیری

دن ہیں میرے اور ہیں راتاں تیری راتاں تیری

بارہا دل نے یہ سمجھایا مجھے

میں ہوں چھوٹاں اور بڑی ذاتاں تیری ذاتاں تیری

دل پریشان جان بے کل آنکھ نم

یاد ہیں سب کو ملاقاتاں تیری

چاند تارے پاس آ بیٹھے میرے

میں نے چھیڑیں رات جب باتاں تیری باتاں تیری

مکمل ہو گئی نعمت رسالت ختم ہوتی ہے

حبیب کبریا تجھ پہ نبوت ختم ہوتی ہے

تمہارے واسطے بزمِ دو عالم کو سجایا تھا

تمہارے بعد دنیا کی صدارت ختم ہوتی ہے

تمہاری ذات کے ہوتے کسی کی بات لایعنی

تمہاری بات پر ساری شریعت ختم ہوتی ہے

وہاں پہلا قدم رکھا تیرے نورانی پیکر نے

جہاں پر نسل انسانی کی عظمت ختم ہوتی ہے

تمہارے آشیانے پر طہارت کی سند اتری

تمہاری آل سے آگے طہارت ختم ہوتی ہے

وہاں سے والضحی کے چہرے کا جلوہ ضو پکڑتا ہے

جہاں پہ ساری دنیا کی بصارت ختم ہوتی ہے

ہمارے واسطے ختم نبوت اصل ایماں ہے

جو منکر ہے وہ کافر ہےوضاحت ختم ہوتی ہے

یونس تحسین

عشق میں آیا وہ مقام آخر

خود کے جلوے میں ہے امام آخر

تم سے مل کر ملے خدا سے ہم

سوزِ ہجراں کے ٹوٹے جام آخر

جان دے دیں گے تیرے غم میں ہم

عشق تیرے میں غلام آخر

خاک اڑائی ہے فلک تک میری

عشق نے یوں کیا ہے کام آخر

آنکھ نے دیکھی حقیقت تو

بت کدے ٹوٹےہیں تمام آخر

ہم تو پڑھتے رہے کلام تیرا

ہو گئے آپ ہم کلام آخر

کیا دل میرا نہیں تھا تمہارا، جواب دو!

برباد کیوں کیا ہے؟ خدارا جواب دو!

کیا تم نہیں ہمارا سہارا، جواب دو!

آنکھیں ملاؤ ہم کو ہمارا جواب دو!

 کل سے مراد صبحِ قیامت سہی، مگر

 اب تم کہاں ملو گے دوبارہ جواب دو!

چہرہ اداس، اشک رواں، دل ہے بے سکوں

میرا قصور ہے کہ تمہارا جواب دو!

دیکھا جو شرم سار الٹ دی بساط شوق

یوں تم سے کوئی جیت کے ہارا جواب دو!

میں ہو گیا تباہ تمہارے ہی سامنے

 کیونکر کیا یہ تم نے گوارا، جواب دو!

تم ناخدا تھےاور طلاطم سے آشنا

کشتی کو کیوں ملا نہ کنارہ جواب دو!

شام آئی، شب گزر گئی، ہونے لگی سحر

 تم نے کہاں یہ وقت گزارا، جواب دو!

دریا کے پار عہد وہ کچھ یاد ہیں تمہیں؟

وہ شب وہ چاندنی وہ کنارہ جواب دو!

لو تم کو بھی بلانے لگے ہیں نصیرؔ وہ

 بولو ارادہ کیا ہے تمہارا، جواب دو!

کلام: پیر نصیر الدین نصیر شاہ رحمۃ اللہ علیہ

میں کہیں بھی جاوں اے جاں میرا انتظار کرنا

میرے بعد پھر کسی سے کبھی تم نہ پیار کرنا

میرا نام جن لبوں  پہ کبھی کھیلتا تھا برسوں

میری جان میں وہی ہوں میر ااعتبار کرنا

تو نگارِ زندگی تھا تو بہارِ زندگی تھا

مجھے یاد ہے ابھی تک تیرا بے قرار کرنا

تو بذاتِ خود نشہ ہے تو مثالِ میکدہ ہے

تیرا خود سے منہ چھپانا مجھے شرم سار کرنا

تو اگر بھٹک بھی جائے تیرے پاس ہے وہ رستہ

جسے نور نے دکھایا وہی اختیار کرنا

کہتے ہو مجھ سے عشق افسانہ چاہیے

رسوائی ہو گی آپ کو شرمانہ چاہیے

خود ار اتنی  فطرتِ رندانہ چاہیے

ساقی بھی خود کہے کوئی پیمانہ چاہیے

عاشق بغیر حسن و جوانی فضول ہے

 جب شمع جل رہی ہو تو پروانہ چاہیے

مٹی خراب کرتے ہو کیوں بیمارِ ہجر کی

جو تم پہ مر گیا اسے دفنانہ چاہیے

آنکھوں میں دم رکا ہےکسی کے لیے ضرور

ورنہ مریضِ ہجر کو مر جانا چاہیے

وعدہ اندھیری رات میں آنے کا اے قمرؔ

اب چاند چھپ گیا انہیں آ جانا چاہیے

قمر جلالوی